Mem+tatsinake wahámat+a ke tem+’it+t+a maiyari kanayenaukani m+k+tsie ta’+kit+ariaka kanikaniereni tatukari meuhane:

Tem+’ukarik+ tem+‘ukitsik+ ke tem+te’uhú

Ke teteutakunaki’eriet+ temu’uwa

T+rí memayenunuiwá

Tetahiwe’eriet+ ke tem+teu’iyayari

CITLALI_EMPODERADA.png

‘Ik+ página kaniutawewiyani maiyá wa+kawame muxuawenik+ pem+rakumaikak+ kepa+ tiyu’uwiyat+ ‘aix+ reu’eriet+ muyeikani.

‘Ena m+tikuxaxatsiwak+ teyu’uat+wamete wahets+a heuyu’aitamieme ke m+tiutah+awarieni waniuki h+xie muyeyeyani kakaniy+weni.

¿”Sexualidad” ke tita ranuy+ne?

"Tanait+  tatukari meuhane ‘ik+ kananuyekaní, m+k+ maiyaritsie ‘ik+ katinayehuni, ke tita pem+tih+k+t+ni ‘uká mex+kat+ni ‘ukí, m+k+ ke me’anenet+ ‘ukari yat+ni ‘ukitsi tem+teta’erie, mana rakunet+ ta ke teteuyuku’eniet+ temu’uwa, titamexi mem+tatenake, tetahiwe’eriet+ ke tem+teu’iyayari, tsitem+teka’eriet+k+katsie, ‘awie ke tem+’it+t+a yaxeik+á t+rí memayenunuiwá kanikuxatani”. OMS 

Mem+tatsinake wahámat+a ke tem+’it+t+a maiyari kanayenaukani m+pa+ tatukari kani’aneni: tem+’ukarik+ tem+‘ukitsik+ ke tem+te’uhú, ke teteutakunaki’eriet+ temu’uwa, t+rí memayenunuiwá yaxeik+á tetahiwe’eriet+ ke tem+teu’iyayari.

Ke teteuyukuxeiyat+ hípame wahámat+a temu’uwa mana m+ katinimiemet+ni (tahepa+ mem+’anene yat+ni y+k+ mem+’anene wahámat+a), hepa+na tsiere ke teteku’eriwat+ ke pa+ tem+teu’iyayari.

 

¿”Género” ke tita ranuy+ne ?

Ke tem+teku’+kit+ariwa ke te’anenet+ tanait+ tem+tinunuiwá tetaxeiyat+ kanixatsiwani: ‘ukari ‘ukitsi ke tem+’anene, hepa+na tsiere y+k+ p+ta mem+’anene yat+ni ‘ukari tsiere ‘ukitsi tiwapini mem+tehexeiya.

Temutinunuiwatsie t+rí ‘ukari tsiere ‘ukitsi y+k+ tekani’aneneni. ‘Ukari mekaniuxapiní ‘ukitsi ta mekaniuh+naríni.

Genero.png

¿“Vínculos afectivos” ke tita ranuy+ne?

Organización Mundial de la Salud hepa+tsitana waniu ‘ipa+ kananuy+neni: “Vinculación afectiva kanih+k+ni teuteri tanuiwaritsiepai tem+teupit+arie hípame tewanaki’eriet+ tem+taxeiyanik+, y+k+ tetetaku’eríyat+ tahetsie tekaw+t+ temu’uwanik+. K+mana hurawa yaxeik+á tsiere ‘atewa ‘iwamarixi tekaniwaxeiyani”.

Tats+a ri ke m+‘ane matsinakeni ke m+’ane ta katixa+ katinikuxaxatsiwani. ‘Ek+ yapekanitay+m+k+ ke m+‘ane ‘aix+ matsimat+wa yat+ni ke m+’ane ‘etsiwa ‘ahepa+ m+tiku’eriwa.
 

Vínculos_afectivos.png

¿”Reproductividad” ke tita tih+k+?

Ke pa+ pey+anet+ herie pemaneni mana pemetikekanik+ kananuy+neni, ke tita matinake ‘atukaritsie petiyeweiyat+, yat+ni t+rí pewaweriyat+ ‘ak+mana m+pa+ peti’erieme.  

"Reproducción” kananuy+neni niwewet+ yat+ni nuariwet+ hepa+na ta yuyetuat+ t+rí wareuta’+wiyawet+ tsiere waweriyawet+.

Icono reproductividad.png

‘Uká kakanit+r+ka+yeni.

MONSTRUO01.png
LUZ_CONOCIMIENTOFELIZ.jpg

Tsimetepepet+ mete’ayenenieret+ “gametos” metetétewat+ t+rí ‘ukari tsiere ‘ukitsi y+k+ te’anenet+ mekatanayeit+wani, tsepá m+pa+ ti’ane kename yaxeik+á tekatey+wawe yat+ni yaxeik+á tekate’uta’uwé kakananuy+neni.

T+rí memayenunuiwá tsiere ke y+anet+ herie maneni.

Teuteri naitsarie temuxuawe yaxeik+á tewaxi mem+yenuiwax+menik+ ‘ik+ meyuhutat+ mekaniuyutin+n+weni. “Óvulo”, tats+ ‘uká tipinieya (‘ukari tewaxi tsiere mekaneixeiyani, tsiere ta “espermatozoide”, ‘ukitsi tewaxi tsiere mekaneixeiyani). Ke pauka ‘ukari tsiere ‘ukitsi tiwapini mem+yutan+it+ani (“espermatozoide” tsiere “óvulo”) “fecundación” katiniyuter+wani, ‘ana m+ ta xewit+ kanayenúiwam+k+.

Teuteri naitsarie temuxuawe t+rí tekanewarayexeiyaweni teukahipitet+, tats+a ri h+nari xapitsié meuhat+arienitsie, yat+ni in vitro (‘ik+ ta kananuy+neni ‘uki espermatozoideya ‘uká niweyameyatsie meu’+niyarienitsie nunutsi mayenuiwak+).

"Reproductividad” teuteri naitsarie memuxuawe ke mey+at+ herie memaneika katinayexeiyani, tats+ ri ke y+anet+ tiparewiet+ mayaní, yu’iwama, yukiekari yat+ni teiyurienaka m+tama. Ke reuyuxeiyam+t+ yutukari muweiyani tsiere ke tiu’+kit+arieka mana muyeikani m+k+tsie kaniyukuhek+k+areni.

Tewi ke m+y+ní yamaineni tsiere hípame ke mem+tekak+né m+warawa+rit+wani kaniy+weni.

MONSTRUO01.png

‘Uká kanitukarieyat+ni t+rí m+warayexexeiyani.

LUZ_CONOCIMIENTOFELIZ.jpg

‘Ukari yuxexuit+ yutukari ke ‘aneme memanukuweiya mekaniy+waweni.  

Educacion sexual

¿”Erotismo” ke tita tih+k+?

Pemiku’eriwani tsiere pemekatsik+yatani ke m+’ane pem+ku’eriwa matsimat+akaku.


‘Ik+ tanait+mat+ ‘ipa+ tiumayaremetsie tekaniuyeneikani, ke tetetaku’eriyat+ tsiere ke teteku’eriwat+ temu’uwa katineutiw+ka, ‘ik+ tinaimetsie katinakuneikani mutax+ré xeime mat+a y+k+ heuy+m+t+.   

M+x+kanitsie ‘auxuwimetsie kaniuyeném+k+:

Mutax+ré, Manutineni, Mayuye‘at+irieni, Mutaxeré.

Temutinunuiwátsiepai m+kuxaxatsiwa xeimetsie tsikere tekaniuyeneikákuni. Tukari meuhane ya’uy+net+ katiniyutaweriyam+k+ mum+nitsie ta mana katiniu’am+k+.     
"Erotismo” tem+wawere tatukari kaniutan+n+weni, tak+mana tsiere hípame tewakuh+awet+ tem+hetimamatekek+. Temariyari yat+ni ‘+imariyari ta’iwama ke m+’ane ts+ mem+tatsinakeni tewawaut+wet+ tekanak+kani.   

 Mem+tatsinake wahámat+a ke tem+’it+t+a maiyari temari yaxeik+á ‘+imarixi mekateni’+kit+ariekakuni. Kananuyehait+aka yuri temaikate waniuki pem+ti’enieka. ‘Ik+ m+tikuxaxatsiwa hetsie timieme heu’eriet+ niuki tsiere y+k+ ‘anukuy+t+ kwínie katinixuaweni; xátsika xeik+a pep+katikuxaxat+ariwani, ke tinetimámatekeni.

Vida sana en pareja

Hik+ ri ‘anekaneuyumaiká...

Ke nem+’anekai hik+ ri y+k+ nem+’ane.

X+ka ‘axuriya kuxi ka’anuyex+r+weni ’ik+ páginatsie m+rayemíe ke neyeweiyani.

X+ka ‘axuriya ri ’anuyex+r+weni ’ik+ heimá ke neup+na.  ‘Ari ri nexuriya kananuyex+r+weni.  

 

‘+imariyari heuyey+anet+ mex+ima y+k+ kaniuy+m+k+ ‘ana m+ ri t+rí warayexeiyawet+ kanayeim+k+. Heri kename ‘uka’iyari ri nunutsi ‘aix+ ‘anet+ warayexeiyawe kakananuy+neni, mets+ katinakweriwayurieweni kepaits+ ‘akuxi m+katse+yeni, tiwa+kawametsie heuyewet+ m+’aneni tsiere ‘akuxi m+wereni.


X+ka ri tem+teheuxeiyat+ka ‘aix+ tiuy+t+kani tatet+ata titaneikakaku, ‘uká ‘ana m+ ri mat+ari xuriyaya kananuyex+riem+k+, yamuy+nítsie “menarquia” katiniuyuter+wani.

menstruacion

Ke pa+mexa tukari raxuriya manuyex+r+weni ‘aix+ katiniyuh+kam+k+. Yamuy+neni kename tukari yatat+’ane katineitimait+yeikam+k+; ‘etsiwat+kaku ‘ukari meyunait+ 28 yat+ni 30 tukari heutineikakaku waxuriya kananuyex+r+weni, 3-7 tukari ‘uti’at+ katineutetereni, ke ts+ m+reukunuiwani m+pa+ kaniuy+ném+k+.   

Hik+ yamupauka tiwa+kawat+ katinixuaweni raxuriya ‘axa m+karamat+akak+. “Toallas femeninas” teiwarit+a wa+kawa kaniyukuma+wani. Hik+ ta tei yurienaka ‘+wiyariet+ hékwamek+ katinanutineikani “copas menstruales” titétewat+ kaniyukuma+wani.

toallas femeninas
copa menstrual

MEUHANÍ MUTI’IWAUX+ANIK+:

Conocimiento

‘Ariké ta ke m+’anekai y+k+ kaniuy+m+k+, rawarie het+a ‘akanatayeurim+k+ tsiere kaneutixik+rax+am+k+, ratsitsite ‘akanitinenerim+k+, yakaniuy+m+k+ tinákemek+ xewit+ ke m+rahetení, ke m+reukunuiwani tsiere ke meupani.

Xeniu y+k+ ‘anet+ mayewení tet+atapai titaneikakaku, m+k+ m+ tsiere “hipófisis” m+titewá y+k+ mekanikuyuruwani (tats+a ri kwaxuatsie timiemet+) ‘ayumieme kwínie reu’eniewet+ kanayeim+k+, mana ta katinakuneka ke m+tiuka’iyárini, tita m+reuyeh+akaní tsiere tita m+ranakeni katiniyupatam+k+.

Mana x+ka heuyey+aneni tsiere ‘ipa+ kaniuy+m+k+, hípat+ mematsinakenitsie kwínie katineka’eriet+yeikam+k+, tats+ ri xeniu xeime heuhiwe’eriet+ kaniuy+ném+k+.
 

DESNUDA.png
Confusión
LUZ_CONOCIMIENTOFELIZ.jpg

Raxuriya manuyex+r+weni ‘axa kananuy+neni.

Raxuriya manuyex+r+weni tatukari katinimiemet+ni.


1.  Wa+kawa pekatinetimaiweni ‘ena peheuhame.
yat+ni
2. Wa+kawa pekatinetimaiweni ‘ena peheuhame.

"vínculo erótico afectivo"  kanixatsiwani yuxexuit+ ke m+’ane mem+te’anakeni.

‘Ipa+ katiniuy+weni ‘ukari tixa+t+tsie mem+teti’erieni yat+ni mem+tetihein+ni tiwax+rit+at+. Xapatuxite    yunait+ memeu’uwe kename meyutinanairieni tsimeteka’eriet+k+kat+,  yat+ni xeime tewi mem+ti’erieni yuxapitsie me’ahawiriket+, tats+ ri xeniu yux+kariyak+ y+k+ meheuy+k+t+.

Erotismo.png
Vínculos_afectivos.png
rosa y gentil _ se besan(1).png

Xeime mat+a x+ka heuyer+m+k+ni tsiere kwínie x+ka ranakeni tixa+t+ kakatinaniereni ‘axa kakanuyuneni. Xewit+ x+ka matsinakeni yat+ni mem+teyunanaimawa mematenake pem+retimanik+ ketinayeter+wani. Tsiere ke petikayame ‘aix+ ‘anémek+ pemuyeikanik+ pekati’akwinit+at+ pem+rakumaikak+.

 ‘Ene meuyey+anenitsie ‘uká nunutsi ke m+’anekai mex+ima y+k+ kaniy+m+k+ tsiere t+rí warayexeiyawet+ kanayeim+k+. Heri kename ‘uka’iyari ri t+rí ‘aix+ ‘anet+ warayexeiyawe kakananuy+neni, mets+ katinakweriwayurieweni kepai ‘akuxi m+katse+yeni, tiwa+kawametsie heuyewet+ m+’aneni tsiere ‘akuxi m+wereni.

Xeime mat+a x+ka heuyer+m+k+ni ‘axa kananuy+neni ‘ayumieme m+tinewani.

monstruo de la ignorancia
niña feliz
LUZ_CONOCIMIENTOFELIZ.jpg
 
GIF_FETO.gif

¡Hik+ t+rí pekaniwarayexeiyaweni!


Organización Mundial de la Salud (OMS) kanaineni waniu temaik+yari yat+ni +imariyari 10 witari kaniyutsut+aka 19 witari ‘utinieret+. Heiwaka temaik+yari yat+ni ‘+imariyari ke mayeteteré ke pauka mutihukatá katiniuyumuririém+k+. Mets+ m+pa+ heuyumait+ kuxi kakanitse+yekám+k+ t+rí m+warayexexeiyanik+ yat+ni m+wawériyanik+, ‘akuxi m+wereni tsiere ‘aix+ ‘akuxi m+katiyukuh+aweni.

M+pa+ heuyumait+ x+ka nunutsi hayexeiya kakatiniukwinim+k+.

MONSTRUO01.png

TSIHEUYUMAIT+ X+KA ’UTIHUKATÁ KENAME YUKWERIWAYURIEKA KATINIYUKU’ERIYANI.

1) ‘Ukari meyu’auxuxuwimetsie naitsarie me’in+atsiet+ yuxewit+ nunutsi kanayexeiya 18 witari kaye’at+awet+, xei witari manukayeika ‘+imarixi tsimeheuyumatet+ t+rí 16 millones meyupa+meme mekaniwarayexexeiyani.

2) Kiekari mem+kateheuxeiya manumanét+katsie, ‘ukari yuhahaikametsie me’in+atsiet+ yuxewit+ ‘+imariyari tsimeheuyumatet+ t+rí mekaniwarayexeiya.


 ¡Tita m+rakuneikat+ká ke tinetimá!

Ke m+tiuy+we m+pa+ heuyumait+ x+ka xeime mat+a ‘ukahupuni.

 

Teuteri memuyunake ke mem+’it+t+a yaxeik+á mekakanaku’aneneni. Wa+kawa rakumait+ x+ka xeime mat+a ‘ukahuni yémek+ ‘aix+ nekuy+nekaku. M+ ta kiekaritsie ke m+reuy+ane titi’in+atsiwat+ katinihek+aka waniu México tsiere Latinoamérica m+pa+ kakatiniy+aneni. Xapate kanixuaweni ‘utiyuat+ kename waniu temari yat+ni ‘+imarixi me’ukahípite ¡14 witari meheuyumait+kait+ yat+ni mekahaye’at+awawet+! X+ka xeime mat+a ‘ukahupuni mutihukatá yaxeik+á hípame kwínit+arika kananiniereni.

Xeime mat+a x+ka ’ukahupuni kayuh+t+ kakanimaiweni, yatat+ katini’aneni. 

Xeime mat+a x+ka ‘ukahuni kayuh+t+ ‘ak+mana ‘atukari pekaniutsewíximaweni, mex+iwa m+pa+ katiniuy+weni. Ke m+tiuy+we ke tinetimai, xewit+ p+kamati’itaiyani, rakumait+ kaxuera kwaxieya m+wíyani hepa+ kananuy+neni, m+kayutsewíximakak+. 

MONSTRUO01.png
CONOCIMIENTO_TRSITE.jpg


X+ka perakumaiká ke m+tiuy+we x+ka kwíniya matsiukuwiya xeime mat+a pe’ukahume pekane’atamaix+am+k+ titayari ‘aix+ tiyu’+wíyat+ muyeikani ‘aix+ m+ti’ane. ‘Ipa+ ketineikuxeiyani:

TIKUYET+ lyutukaritsie yatiuka’eniwat+ kanayeim+k+, ¿titak+ tiyutsewíximaka?, p+kaheuyewetsé.

Virusweb.png

Kwíniya manuyeiká xeime mat+a ‘ukahume.

 

KWÍNIYA

KE MUMAYARE  TSIERE KEPA+ PEM+TI’IN+IWE

KE PEM+REUKUKUYE

¿HERIE PERANEWE?

KE PA+ M+TIYU’UWIYANI

Herpes genital

 

‘Ik+ kwíniya kaniwewieka tsitipet+ muixak+a m+rakwinit+aka ‘etsa hepa+ ‘anet+ kanikunex+am+k+ kwínie tiyukukwinet+. 

HERPES SIMPLEX VIRUS TIPO II

HAWAIK+

Tixa+t+k+ tiyu’+wiyat+ yat+ni yunewat+.

Linfogranuloma Venéreo

‘Ik+ kwíniya kanakuneikani hípame wahámat+a pemukahupunitsie, yémek+ mekanika’eniwani ke hate ya’aneme mem+yeweiya, ‘ukitsi wa+kawa mekanika’eniwani, ‘ik+ kwíniya kanayehaikareni: Mat+arieka rateuriteta haiyá kanikuném+k+, ‘ut+mana rak+ipit+a  kanatihaim+k+, ‘imat+rieka rak+tsata katiniuka‘enim+k+.  

CLAMIDIA TIPO L1,L2,L3

HU

Tixa+t+k+ tiyu’+wiyat+ yat+ni yunewat+.

Ladillas

“Ladilla” titewat+ yakatinipeni ‘até hepa+ kani’aneni rahuxarita kaniuyeikani. Kwínie katiniyutsikwakiriyani. Hakiewa mem+heukutét+kani mematsikukewekaku ‘anawiyaritsie y+y+wit+ yat+ni yuyuarawit+ kanikumarix+am+k+.  Hepa+na k+pate ‘epapat+ meuxuawetsie mekaniyaxikeni tats+a ri rats+ik+ritsie, rakarim+xitsie, ratawitsie, raxet+a tsiere ram+xiyatsie. Tsepá wa+ká teka’imáriwa, ‘ik+ kwíniya kanixuaweni.

PHTHIRIUS PUBIS (PARÁSITO)

HU

Xeik+a ‘aix+ ’anet+ yu’+wíyat+.

Granuloma Inguinal (Bubones)

Tsitipet+ katinayuriem+k+ yupinitetsie keneukutekix+am+k+ (raxapitsie, rah+naritsie) ‘Ataxewime tukari yat+ni haika metseri ‘anutiyayu katiniuka’enim+k+. Tsitinenet+ tixuxuret+ katinikunex+akuni ‘anawiyari ‘axa mekuyuruwat+.

CLAMIDIA TRACHOMATIS (BACTERIA)

HU

Tixa+t+k+ tiyu’+wiyat+ yat+ni yunewat+.

Vulvovaginitis Tricomoniásica

‘Ik+ kananuyekaní kwínie katineukwiniyaka. Kanakuneikani x+ka wa+kawa wahámat+a ‘ukahupuni. Raxipitsie tiukwuri’iat+ katinaneikám+k+, yupinitetsie kanatsikwakiekam+k+ tsiere mutaxieyanitsie katiniyukukwineni. ‘Ik+ kwíniya ‘ukitsi mekakanika’eniwani. X+ka ‘uká ‘ayehukaní katinikweriwayurieweni.  

T VAGINALIS (PARÁSITO)

HU

Tixa+t+k+ tiyu’+wiyat+ yat+ni yunewat+.

Hepatitis Virales

“Hepatitis” ‘ipa+ katiniyuyuruwani ranema katinatahaim+k+ tsiere katinikwínim+k+. “Hepatitis” a, b, c, d kaneuxuaweni tsiere yunait+ MEKANIM+IYAKA.

Varios

HAWAIK+

Tixa+t+k+ tiyu’+wiyat+ yat+ni yunewat+ tsiere ke m+’ane m+tikuyeni kakuma+wat+.

Gonorrea

'Ik+ kwíniyayari ti'a+ra+yet+ m+tiuyewewenat+katsie katinayuriem+k+, xixi muyekuketsie, niweyame k+ipieyatsie, rak+tsata tsiere ratarik+xatsie yat+ni tah+xite heriena tsititsuit+ m+tikaweretsie. Xeime mat+a 'ukahume kani'in+im+k+, 'ipa+ kanimayaka rah+narita yat+ni raxapitsie m+tiuhanet+kani, yam+tiuxieyani tsiere yam+rekaxim+kat+yeikani.

GONORRHOEAE (BACTERIAS)

HU

Tixa+t+k+ tiyu’+wiyat+ yat+ni yunewat+.

Verrugas genitales (condilomas)

‘Etsá hepa+ ‘anenet+ rateuriteta kananex+akuni ‘ik+ kwíniya kaniu’in+im+k+ xeime nawiyarieyatsie tinanet+ meutaneikanitsie. VPH  yutetata tsiere kaniu’in+im+k+. Teuteri meyuxexuit+ y+k+ mekanimayaka. Ke m+mayá rakunet+ yuniweyametsie cáncerk+ katiniutakwiniweni.

Papiloma Humano (VPH)

HU

Tixa+t+k+ tiyu’+wiyat+ yat+ni yunewat+.

Chancro blando

Sífilis m+yukatsut+anitsie ‘ik+ katinitewaka ranawiyaritsie kaneukutekim+k+, ti'a+ra+yet+ haneikat+. 10-90 tukari rahetsie m+yeyer+ni katineutetereni.

H DUCREYII (BACTERIA)

HU

Tixa+t+k+ tiyu’+wiyat+ yat+ni yunewat+.

VPH

“Papiloma humano” titewat+ kanakumatiwani, ranawiyari tekwinit+wamete kaniwa'iwat+ni,   meyuweriyat+ tsiere tex+rawit+ mekuneikat+. Pei'in+me 'etsiwat+kaku xei metseriyari yat+ni ‘atanaukame metseriyari yeyer+net+ kanitihuim+t+. 'Ik+ kwíniyayari 'emekaniyupa+meni hípat+ mekanicánceryaka.  

Citología

HAWAIK+

Tixa+t+k+ tiyu’+wiyat+ yat+ni yunewat+.

VIH

ELISA/WESTER BOLT

HAWAIK+

Tixa+t+k+ tiyu’+wiyat+ yat+ni yunewat+.

Sifilis

“Treponema Pallidum” titewat+ tsitipet+ katiniyuyuruwani, tata+ta naitsarie muyeyeikani kaniy+weni tem+teuyepit+ka tikwinit+at+. ‘Ik+ kwíniya haikametsie kaniutineikani, x+ka ka'uyuta'aita kanim+iyaka.

VDRL

HU

Tixa+t+k+ tiyu’+wiyat+ yat+ni yunewat+.

Clamidiasis

“Chlamydia Trachomatis” tsitipet+ katinitewaka. Miti’in+nitsie 'atahutayat+ni xei tewiyari tukari heimana ‘anutiyayu kaniuyuta'eniem+k+, yat+t+ heiwaka tsikakanimayaka.

Citología

HU

Tixa+t+k+ tiyu’+wiyat+ yat+ni yunewat+.

VIH tsitipet+ tsimetepepet+ taheimá nunuwamete m+watikukuya kanih+k+ni, SIDA kwíniyayari mana kanakuneikani. M+tuiriyarienitsie yapauka naitsarie kamanitan+im+k+ hepa+na m+tihaxikit+katsie kani’in+im+k+ tats+ ri xuriya, xapí m+titatuaya, h+narita m+tiwatineika (mutax+retsie tsiere yux+kariya maye'at+anitsie), t+rí wamama memi'in+i waretsitsie tsiere ke hate ri mem+tekukuye.

Kwíniya wapeheukax+riet+ peti’akweriwayurieni? Tsikere ‘ik+ maiyá ketineutixeiya yaperamait+ kename memeuyumait+ka mem+te’ayexeiyatsie peuyehaket+ ‘akuxi peuyewet+ tsipeheuyumait+  pey+ane.

CONOCIMIENTO_TRSITE.jpg

Nunutsi makayer+nitsie tsiere mayenuiwatsie.

Nunutsi makayer+nik+ ‘atukari pem+m+’axiekatsie pekaneuyeyeikam+k+, tats+ “óvulo” pemutatuayanitsie kananuy+neni, tsiere xeime mat+a pe’ukahup+t+, tats+ ri xeyunát+wet+. X+ka ‘axuriya 28 tukari ‘anukayeikakaku ‘anuyex+r+weni, “óvulo” pekanitatuayani ke pauka ‘axuriya manuyex+ri 13 tsiere 15 tukari ‘anutiyayu. Heri ‘ik+ ‘anuy+neka kename ka’utihukatawe, mets+ heiwaka yaxeik+á ‘upaukakaku kakanayeikani ke ts+ m+reu’erieka, ke m+tiukwa’ani yat+ni tihípametsie yuxewit+ ‘uká ke maku’aneni.

Organización Mundial de la Salud (OMS) hepa+tsitana temaik+yari tsiere ‘+imariyari waniu ‘ipa+ kanayetetereni 10 witari mexeiyanitsie ‘uyukatsutsut+wat+ 19 witari mexeiyanitsie kaniutiniereni.

Niweyame yuk+mana ‘aix+ kaniyukuyuruwani nunutsi makayer+nik+ xei metseri ‘anukayeikakaku. ‘Uká ‘ovuloya tats+ ri ‘uká ‘im+arieya m+wayuwewie kananayeyeikani “espermatozoide” tanakeke. Ke pauka m+pa+ m+tiy+ní “fecundación” kanixatsiwani. Niweyame ‘akaniutatsutsuireni tsiere kanitayumenareni xuriya wa+kawa hets+ena m+ye’axék+ mets+ m+k+tsie nunutsi kaniyeyer+m+k+.

Rosa y gentil cama_FN.jpg
 

Xuriya manuyex+r+wenitsie tukari ‘in+ariyari ‘ak+mana pem+xeiyani. ‘Ik+ kamaniuparewiweni pem+ka‘utihukatanik+ m+pa+ x+ka pekara’eriwani tsiere ‘ek+ ke pa+ pemuy+né pem+rakumaikák+.
 
‘Ena manakahápawa tsiere ke pa+ xuriya manuyex+x+wenitsie tukari ‘in+ariyari tixeiyat+re tematsiku‘eiririeni, m+k+tsie pekanieret+ ‘axuriya manuyex+r+wenitsie ke pem+titiyuriet+yani ‘aix+ ‘iyari pekatinayexeiyakam+k+. Yémek+ ta yuri pep+kati’erieka, ‘ek+ matsi ‘aix+ pekatina’akumaiká, xei tapari ta, ¿’Aix+ matsi kati’ane ‘ik+ pem+rakumaiká? ‘Ek+ ts+ pekaniy+aném+k+:

LUZ_CONOCIMIENTOFELIZ.jpg

¿Pem+tihukatatsie ‘atet+ata ke

pa+ m+tikuy+ne

pereumaim+k+? 

‘Ena keneuhakí

AZUL_PRESENTACION.jpg

Ke pauka ri ‘axuriya ‘anuyex+r+wet+ pem+tayuani, yaxeik+á ‘upaukakaku m+pa+ pem+ka’uy+neni, reumiet+ yuk+mana tukari yaxeik+á pa+mexa ‘anukayeikakaku kananuyex+r+wem+k+. Kananuyehait+aka ‘atukari ‘in+ariyari yapem+tixeiyani mana pem+’a’+wíyak+ x+ka ri tukari yaxeik+á pa+mexa heutineikakaku m+pa+ pe’uy+neni.

X+ka tukari yaxeik+á pa+mexa kaheutineikakaku m+pa+ pe’uy+neni tukari ‘in+ariyaritsie pekatikunanaket+, tsepá yam+tiyey+xime pem+raka’ut+wani. M+tiyeyaní ti’uatame hets+a x+ari pekanimieni m+k+ pem+raka’ut+wa retimaime ‘aix+ matsi kamatiniparewiem+k+.  ‘Axuriya manuyex+r+wenitsie y+k+ pekaniuy+neni ‘atukari ‘in+ariyari ‘etsiwa wape’uh+at+, ‘ena hípame tekanitixatakuni:

 
Aurora_presentaciónweb.jpg

X+ka ‘ipa+ petiyumaiká tats+ rí ‘axuriya ‘anuyex+rienike: 

- Rawari m+ratakwine.

- Ratsitsite m+tinaranax+ani, m+tihaix+ani tsiere m+ratikwit+kani.

- Ramu’u m+rakukwineni.

- Xumatsi mayenex+ani.

-  ‘Aix+ ‘iyari m+ka’utikukutsuni.

-  Kwínie m+reu’enieka.

-  ‘Atsitsitetsie pemahaix+ani tsiere ‘ahukatsie.  

“Toalla femenina” xeime ‘ak+tsiurita yaketinekuhurieneni, kamaniuparewiweni yat+ni ‘ahamika ke m+’ane meiyeh+aká pekaniuparewiweni.

’Ana m+ ‘aix+ ketineutikukutsuni, tsikere 8 horas.

Y+rari wa+kawa pekaniutikwa’am+k+ pekakwitawet+ pem+ka’ayeikanik+.

¿Ke pauka ti’uatame hets+a p+tik+kat+re?

Ke pauka ‘axuriya ‘anuyex+r+wet+ muyukatsut+ani ‘ana m+ ‘aix+ kanikuy+neni ti’uatame hets+a ke pauka pem+mié pemeitimaix+ani. X+ka ‘aix+ tinaimetsie pe‘aneni ‘ats+pem+kara’eriwani, x+ari ts+ kaheuyewet+ katini’anekam+k+. Yat+t+, heiwaka ti’uatame hets+a meumieni heuyewet+ kanayeikani:

  1. - X+ka ‘axuriya yaxeik+á pa+mexa tukari heutineikakaku ‘anuyex+r+wekait+ni yuk+mana ta ‘uyupata.

  2. - X+ka ‘axuriya heunuani.

  3. - ‘Ah+xietsie wa+kawa pe‘ayehuxareni, ‘atawitsie yat+ni ‘ahukatsie.

  4. - X+ka ‘axuriya ‘anuyex+r+wet+ ‘atahútame tukari heimana reutetereni, x+ka kwínie xuriya ranuyex+r+weni yat+ni 21 tukari het+a ’akatetewaret+ m+pa+ pe’uy+neni.

  5. - X+ka 45 tukari heimana ‘akatewareme ‘axuriya ‘anuyex+rieni. transcurren más de 45 días entre una menstruación y la siguiente.

  6. X+ka kwínie petiukakukwineni yat+ni ‘ahukatsie kwínie maranuyekukwineni.

  7. - X+ka kahaye’awekaku ‘axuriya ‘anuyex+riweni.

  8. - X+ka haika witari heimana ‘axuriya tukari yaxeik+á pa+mexa heutineikakaku ka‘anuyex+r+weni.

CITLALICALENDARIO.png
LUZ_CONOCIMIENTOFELIZ.jpg

‘Ukari hípat+ mekanixuaweni waxuriya wa+kawa ‘anuyex+r+wet+ tsepá net+ ti’uatame hets+a pemeumieni ‘aix+ kani’aneni x+ka “copas menstruales” yat+ni “toallas sanitarias” mutiuyuter+wa ‘ahepa+tsita heuyewet+ ‘ayeikani. Hípat+ ‘ukari waxuriya wa+kawa kananuyex+r+weni, mekayu’aitat+ ‘anemia kaniwakuwíyaweni.  Pep+kayu’eirieka, kene’a’+wíyani. 

FANTASMA01.png

¿X+ka raxuriya wa+kawa ‘anuyex+r+weni y+k+ kakatinanuy+neni ‘ayumieme nekakatine’aitani?

Anemia kwiniyayari: Kayuhek+at+ m+k+ ‘axa m+rayurieni.

“Anemia” kwiniyayari hierro raxuriyatsie heuyewet+ kananuy+neni. Tsepá m+pa+ tekateku’eriwa wa+kawa kaneukwiniyaka. ‘Aix+ katiukwa’at+ ‘ik+k+ katiniutakwínim+k+ yat+ni kwíniya t+r+ka+yémek+ tikuyet+ kanakuneweni.

 

Ke pauka temaik+yari yat+ni ’+imariyari pemeuyeneni “hierro” m+rexeiya yapem+tiukwa’ani, (wai m+xuxure, m+titsitsi+rawi, mume, ke m+reupa+me tset+) ke pai ts+ ‘axuriya peheuyeh+pat+ pekanayeikam+k+.  

 

 

‘Ayumieme ‘a’ikwai ke ne’+wíyani tsiere ke pauka ‘axuriya manuyex+r+we ke pemuy+ne ke ne’aku’+wíyani. Kename “kayuhek+á” tekaniutiyuaneni ke pai yareukukuyet+ mex+ima kanayeiwem+k+ teuteri ta kename mekat+r+kawi xeik+a mekateniu’eriweni.   

 
MONSTRUO01.png
LUZ_CONOCIMIENTOFELIZ.jpg

Yam+reu’uxeni y+k+ kakatinanuy+neni, ne tat+ yanekani’aneni.

Y+K+ KANANUY+NENI x+ka yareu’uxeni. X+ka m+pa+ matiyurieneni “anemia” kwiniyayari x+ari pekanexeiyani.  Ti’uatame hets+a ke nemié pemanayeweník+ yaketinekamieni. “Anemia” hexeiyat+ ‘aix+ kareu’eriet+ kaniuyeikam+k+.

YUK+MANA MUYUKUMAY+ANI.

“Masturbacion” kanih+k+ni yupinitetsie yuk+mana yukuma+wat+ tsim+reka’eriet+yanik+. ‘Ukari wahepa+tsita hakiewa kwínie mem+teu’enie mekaniyukuma+wani, tats+ yuteta, yutsitsite, yuteurite tsiere yuxapitsie yatinet+ maka, m+k+tsie kwínie mekateneu’enieka. ‘Ukari yuk+mana mem+yukuma+wani kakanimaiweni, ke pai ts+ yuhetsie ke mumayare mekatenetimait+k+kani hepa+na ‘aix+ matsi mete’ayukumait+ xeime mat+a ‘uxa’a warié m+pa+ mekaniutiy+waweni.

 

‘Ukari nunutsiyaripai yuk+mana mekaniyutima+wani. Yat+t+, axa katiku’eriwat+ m+pa+ m+tiumieni katinaniniereni. ‘Ukitsi matsi wa+ká mekanipit+arieka m+pa+ mem+’it+aka, yat+t+, ‘ukari hepa+na ‘ukitsi m+pa+ mem+y+aka ‘atsikakatini’aneni temaikiyari yat+ni ‘+imariyari matsi x+ka meheuyey+aka.

“Vulva” rateurite ta+ta kanamakaní, ‘emetineriketsie mana nawiyari tsitsutsuit+ kaneuwakaw+t+kani, yatinet+ tsiere “clitoris” titewat+ kanakaní, x+ka ’ikumay+ani kanitsik+yaka kwínie m+reu’eniewek+. “Clítoris” waniu ‘ukari katiniwapinit+ni m+k+tsie yémek+ tsimekateneka’eriet+k+kani.

Vulva y clitoris copy.png

Ts+ katiniyurit+ni, ‘ik+ m+tiuyukaxeirienitsie tsikatineka’eriet+yeikam+k+. Yamumayarek+ m+k+tsie xeik+a pep+ka’aku’+wíyani. Tihípame pekatiniu’akaxeirieweni, tsepá net+ ‘ik+ hékwamek+ pem+tiu’akaxeiri ‘atsikakatini’aneni. Tekamani’inieka ‘ik+ maiyá pemakateriwa:

‘Ena ke neuhakí

FANTASMA02.png

‘Ukari t+rí yuxapítsie mem+yukuma+wani kanimaiweni ‘axa m+ranuy+nek+, tsimem+teka’eriet+k+kanitsie ta huxari kanikunex+am+k+ yat+ni y+k+ katiniwayuriem+k+?

Clitoris.png
LUZ_CONOCIMIENTOFELIZ.jpg
  1. “Clítoris” mutiuyuter+wa xapí ta+tá kakanakaní.

  2. “Clítoris” ke m+’ane, h+nari hepa+ kani’aneni tsiere hepa+na kanipani.

  3. Waiyariyari ‘akaniutapapareni ke pauka m+x+kaní.

  4. M+tiuyehápanet+ka tem+teu’eniekak+ 8 mil pa+met+ ta+tana kaniyuxe+rieka, h+nari ta 4 mil pa+met+ kanexeiyani.   

  5. Xuriya muyekuke k+mana  ‘akaniutapapareni, ya’uy+nekaku tsepá ke m+’ane tewi clítoris hexeiyat+ yux+karíya muixa kanayuye’at+irieweni.

‘Ik+ kaniyuxewiní yunait+ teuteri mekaneixeiyani xeik+a tsimem+teka’eriet+yeikanik+ kaniyunaki’erieka.

Hakiewa’ik+ maiyá manayehápanie pem+kaxeiyak+ ‘ena ke neuhakí.

¡‘Ik+ ke neuxeiya!

”Clítoris” tsiere h+nari yaxeik+á mekateneukunuiwani.  

Teyutsata

Teyutsata tem+texuawe hetsie timieme nekatinimaim+k+ni.

Tem+’ukitsik+ tem+’ukarik+ ke tem+te’uhú reutixeiyax+ame.
Yuheimá nunuwame, ke tem+tekahuni, yaxeik+á tetehaye’at+ tsiere tinákemek+ temu’uwani.

‘Aix+ ‘anémek+ hípame teuteri tewaxeiyat+ temu’uwani katinanuhait+aka temeitimámatekeni.

Yunait+ tahepa+ mep+kateyukuh+awe tsiere mep+kateheu’erie.  Yuxexuit+ mekaniy+waweni yutukari ke ‘aneme memeuxeiyaku m+pa+ mem+teiweiyani.

Teuteri naitsarie temu’uwa tekanih+k+t+ni, yaxeik+á tatukari t+t+ kani’aneni, ‘ayumieme tanait+mat+ tem+teuterik+ taheimá nunuwame tekanexeiyani yaxeik+á ke tem+tekahuni katinaniniereni, tsepá m+ti’uká yat+ni m+ti‘ukí, yunawiyaritsie ke meu’ane yat+ni ‘ukari yat+ni ‘ukitsi mete’anakeni. Tsepá y+k+ pem+ti’akuh+awe ‘ek+ ‘aix+ mematexeiyani pemeuyeh+akaku, ¿m+pa+ me m+ti’ane? Tsikarik+ yaxeik+á ‘anémek+ meyunait+mat+ tenewaxeiyanikeyu tsepá yutukari y+k+ mem+te’uweiya yat+ni y+k+ meteuyukuwimat+ me’utiyaxike.

 

Tem+’ukarik+ tem+‘ukitsik+ ke tem+te’uhú x+ka reutixeiyax+ani ‘axa kananuy+neni, ke hate y+k+ memuteyukuh+awe tsiere y+k+ mem+teka’eriet+k+ka mep+xane’eriwani, yuheimá nunuwame memexeiyani tep+kawa’eirieka.  

MONSTRUO01.png

Tsepá kepai tewi, xeik+a muyeikak+ yuheimá nunuwame kanexeiyani. ¿Perakumaikai kename kiekarite xuawe teuteri yu’its+kate yat+ni hípat+ kiekatari wahepa+ mem+kateku’eriwak+ me’uniwat+ tsiere me’ukwiyawet+? ‘Aix+ ‘anémek+ meyunait+mat+ mem+xeiyariekak+ yuheimá nunuwame meyunait+mat+ yuri mekatene’ayeit+iriyar+wam+k+.

LUZ_CONOCIMIENTOFELIZ.jpg
Ángel_independencia.png

Tetanait+mat+ tekanikuteni, takiekari kanitamakaní, kiekari xapateya ke mutiyuane hayuye’at+wat+ ‘aix+ ‘iyari tsiere ‘aix+ ‘anémek+ tekaniu’uwam+k+.

Teuteri memanuhane yutsata yeiyari tekaniuweiyani tsiere y+k+ tekateniyukuh+aweni, x+ka kiekari xapateya tanaime tahetsie mieme ‘aku xeniu tikateni, ‘axeik+a tewaikat+wet+ tekanak+kani, waikari yaxeik+á ‘anet+ tanaime tahepa+tsita kanayeikani. ’Aix+ ‘anémek+ tetaxeiyat+ xeik+a m+pa+ katiniuy+weni. Y+k+ tem+teku’eriwani temawierikak+ tsiere ‘aix+ ‘anémek+ kanikuy+wekarem+k+. Xeik+a ta meyunait+mat+ ‘aix+ mekatene’aka’it+iriyar+wam+k+ tsiere yuheimá nunuwame yuri mekatene’ayeit+iriyar+wam+k+.

TSEPÁ Y+K+ TEM+’ANENE, TANAIT+MAT+ TAHEIMÁ NUNUWAME YAXEIK+Á KANI’ANENENI.

Tanuiwaritsie tem+teupit+arie, tita tem+tekema, ke tem+tey+wawe yat+ni tsiere ke tem+’anene, k+mana tekanitaxexuika tekaniu’uwani tame xeik+a yate’anenet+.

‘Ayumieme tanait+mat+ yaxeik+á tem+te’aye’ar+kaní katinanuyehait+aka (YAXEIK+Á ‘ANÉMEK+ M+XEIYARIEKA, xewit+ xeik+a ‘aix+ tixeiyariet+ xewit+ ta nanaimariet+), tsiere y+k+ tem+’anenek+ taheimá mem+ka’uyehuni.

Ke tiuka’iyarit+ muyukweriwayurieka

 

Teyu’+kit+wame watsewíximarika (bullying) kanih+k+ni kumay+iwat+ tikwinit+ariet+, ‘axa tikuh+awar+wat+ yat+ni yuh+awiyatsie tikwinit+ariet+, yam+’it+arieneni tikwinit+ariem+t+.


‘Ik+ “escuelas” manuwet+ka katineuy+aneni teyu’+kit+wamete tsepá yu’+kit+arikatsie hakiewa me’utihú katiniwayurieneni, xane’erikatsie katinakuneweni (yunawiyaritsie ke meu’aneni, ke meuyumateni, ke m+reukukani, ke hate m+wa’iyatani, ke ranuy+t+kaimek+ tset+) xeik+a ‘aix+ m+reka’eriet+yeikanik+ yat+ni meyuwaikat+wet+, xeime me‘íwakut+ me’imariutat+ yat+ni me’ikweriwayuriet+. ‘Ik+ nanaimárika yam+’anetsie mekaniukax+riwaweni yuhepa+ teyu’+kit+wamete, te’+kitamete yat+ni tsepá ke m+’ane tewi “escuela” ‘uyeikat+.   

“Bullyng” p+netemawierika, hípame newananaimat+ ‘aix+ nep+reka’eriet+yeika.

Teyu’+kit+wamete watsewíximarika m+tiuyuter+wa mayaník+ ‘ipa+ katini’anekam+k+:

LUZ_CONOCIMIENTOFELIZ.jpg
MONSTRUO01.png
  1. Xewit+ tiyutsewíximawat+ kaniuyeikam+k+ tsewíximariekame heimá ‘uyemiet+.

  2. Tsewíximariekame mekamat+yeikani ke pauka m+tikwinit+a m+xeiyani yat+ni mukaxexeiyani.

  3. Tsewíximariekame yam+tikwinit+arieka. Yuxexuit+ tsiere meyuwa+kawat+ yamekaniuyuyuriwaweni.

  4. Tsewíximariekame yu’+kit+arikatsie manukawení.

  5. Ke hate wah+r+pa m+tiyukwine mem+kaheuyeniukani tsiere kaiwat+ mem+taniniereni.

  6. Tsewíximariekame m+tiwa’+kit+arie m+kaheuyeim+k+ni, yapauka meuyuyeh+pani (m+kareu’enieka, meuyuheiwerieka, yuhamíkuma tsiere yu’iwama wam+wareukax+rieka).

Wa+ríyarika m+yex+at+ariekatsie ‘ik+ kanihípat+ni:

Kwínit+arika niukik+

Kwínit+arika kumay+iwat+

Yuh+awiyatsie kwínit+arika

Metaimar+wani, mutiketsinar+wani, het+ana memeuta’+katani metiwitsewenik+, m+tiweiwani. Tsiere kwínit+arika kumay+iwat+ kananuy+neni tsewíximariekame ke pauka piniteya m+tikunawairiyar+wani yat+ni mem+tetitsewíximawani, tuminieya, mem+teikunawatsiriwani, piniteya mem+teitiketsiniriwani, ke ranuy+t+kaimek+ tset+.

azul_la empujan.jpg
AZUL_RECHAZOPOROTROS.jpg

‘Ik+tsie kaneutiw+ka ‘axa m+tikumamatiwani, y+k+ m+tiuter+war+wani, tsewíximariekame m+niukimarieka yat+ni ‘itárika hetsiena mieme muyukuxatani, ke m+tiyurienek+, tixa+t+tsie m+katiy+wek+ yat+ni ke m+’anek+ m+ta’atsieriwani.

‘Ik+ kwínit+arika ke m+tiyuku’eriyanitsie kaniu’it+ariem+k+ tita m+reutexieka matsi kwínie reutexeit+ kanayeim+k+. Yam+timariutsieka, ‘axa tiyeh+awariet+ wa+riyárika m+ti’ait+arieka, yat+ni tsewíximariekame m+’unierieka m+tiyutsewíximawa yakaniyurieném+k+. Tsiere kaneutiw+ka m+tiyutsewíximawa tsewíximariekame wa+ríyarika m+ti’ait+aka yakara’eriwakaku. 

azul la molestan copy.jpg

Agresión psicológica

Teuteri watsata kwínit+arika

Namiem+t+ wa+ríyarika yex+at+ariet+

M+reu’uriketsie wa+ríyarika yex+at+ariet+

Kananuy+neni ke pauka tsewíximariekame wameukah+iwani yameyupa+met+ ‘iwamama meka’i’eniet+ tsiere yuxa+tá memiku’e’eiriwani meka’i’iniet+. Tsewíximariekame yam+’it+arieneni ke m+’anek+, ke m+reukukak+, ke m+timatek+, ke m+’ane m+wa’iyatak+, hípame wahepa+ m+’anek+, ke ranuy+t+kaimek+ tset+.   

azul_le dicen de cosas copy.jpg

Wa+ríyarika m+’iwaurienenitsie yat+ni m+kumay+iwanitsie kanikuxatani. Kaneutiw+ka ‘axa m+tikuh+awar+wani, m+tiweiwani yat+ni wa+ríyarika mutinamiewani, tsiere yaxeik+á me’anenet+ mem+yu’iyata mem+xane’eriwa.

Patan_fuerza_a_Carmínweb.jpg

Tihehékwat+ m+ranutineika meyunait+mat+ meuw+w+rekaku, “ciberacoso” mutiuyuter+wa ‘etewapai kanihek+ariweni mex+ima tixeiyariewet+, tsewíximariekame ‘utsikak+ m+tikwinit+ariekatsie tsiere m+’uniwanitsie kaniyukuhek+k+areni; yat+ni m+’+kierienitsie, hetsiena timieme yat+ni ‘+kiyaya m+ranuyutin+’awanitsie humapai m+tixeiyariekak+. 
 

Ciberbulliyng.jpg

‘Ipa+ ts+ katiniy+aneni m+tiyunanaimawa yumaremá wahámat+a ‘aix+ kareukukait+ katiniuka’iyarini, matsipait+ m+pa+ ranuyeyaka x+ari katiniumieni. Nanaimárika tsata kaniutaweré tsiere kanaki’eriwat+. Ke m+‘ane m+tsewíximariene yuhetsie ta m+kanuaka, m+k+ x+ari kaheuyuyeh+at+ kani’aneni yat+ni ke m+’ane mikananaima kwínie reutexiet+. ¿Ke pey+me wa+ríyarika pep+kayex+at+arieka?:
MATIKWINIT+WA KE NEUKU’EIRI.  Parewiya ke m+’ane ‘aix+ pem+timate hets+a keneukuwawá yamatsiyuriene ta keneutaxaneta. Pem+tikwinit+arieka pep+ka’a’eirieka.

Wa+ríyarika yex+at+ariet+ tita m+rakuneika:

CONOCIMIENTO_TRSITE.jpg

  1. Yuh+awiyatsie muyuyuipikeni.

  2. M+nutuixieka.

  3. Yam+ti’uxeni yat+ni mu’uxikeni yuh+awiyak+.

  4. Kename yumiení m+tiku’eriwani.

  5. Hípame m+wahékani.

  6. Muyukuh+aní m+tiku’eriwani.

  7. M+kay+weni hípame m+warayexeiyani.  

  8. Hípame wahetsie m+kaheuwaureni.

  9. M+tiwayu’+kit+a manayeyaní.

  10. Yamem+teyuyúruwa kiekari kwínit+wamete mekanak+niwaweni.   

Ne nep+tiunekananaimawa, m+k+tsie nep+net+r+kariya.

X+ka tsewíximarika pe’ayexeiyani hípame pekaniwatsewíximaka tsiere pekani’atsewíximaka. ‘Ek+ x+ka m+pa+ peti’ayuruwani peramait+ yat+ni kename m+pa+ peti’ayuruwa petikuh+awar+wani, parewiya ke neukuwauka ke ne’aparewin+aka, petiu’akananaimat+ hípame pekatiniwakwinit+aka hepa+na tsiere pekatini’akwinit+aka.

MONSTRUO01.png

¿Wa+ríyarika petiyex+at+arie yat+ni pera’akumate PETIU’AKANANAIMAWA?

‘Ek+ ‘ak+mana herie pepa’anet+awe.

Ke tatina’ut+iri
contacto.consexual@gmail.com

LUZ_CONOCIMIENTOFELIZ.jpg

Y+K+ M+TIMAYAT+KA TSIERE M+TAWAIYA… ‘axa meteu’iyarime pewan+t+.

¿Perakumaikai kename m+tawaiya yuhetsie rakawieni? M+tiwayuwewie mamariwawet+ ranuwet+kaikaku temari tsiere ‘+imarixi mekanawa+rit+ariwani ‘ik+ yam+ti’anenetsie memayukaw+w+t+wani. Tiyumainiat+ katiniy+aneni: ‘ik+ yam+ti’anene ‘amaiyá makanikwa’ani mana ta rakunet+ ‘aix+ pekatikamiet+ pekanayewautseni. ‘Ayumieme pekatimaiwet+ x+ka mematsayeit+wani, wahepa+tsita tsikatinikuy+neni, wawewiya m+katiyunaki’eriet+ka yapem+tiwananairieka ‘ek+ ta yapetitaxeiyariet+ pemayeit+arieni m+tim+iyat+ka mem+tewewie pewatuminit+at+. M+pa+ yéme xeik+a katini’aneni.

‘Ik+ maiyá titatsie m+rayuyehapa: Xapa “Xim+xi, temaik+yari tsiere ‘+imariyari kene’atemawieka”.   

¿Perakumaikai kename yape’amait+ ‘akwaxua kuxi yuyewéwixime? M+tawaiya ‘akwaxua m+yuyewéwixime katinimuririeweni. ‘Ipa+ temateku’+xatsit+wa yepemeu’amate m+titawaiyat+ka pep+katiye’eni.

X+ka ri ta pe’iye’eni tinákemek+ ke ney+aneni. Ts+ tsi’anuy+neka ‘atsi ‘uayemariet+ hepa+ wapemuwautset+yeikani, pe’akweriwayuriet+ pekaniy+aném+k+, tsiere pekaheyuta’eriwat+ xewit+ tewi tiuyukananaimawat+ y+k+ kamaniuyuriweni. Pep+kati’a‘itaiyani, yam+ti’anene x+ka ti’iyamakani NANAIMÁRIKA kani’iniekam+k+ m+k+ ta ratan+ime ‘iyari ‘axa ‘anet+ pekaniukaxeiyaweni  mex+ima matsatih+awet+ ‘atukari ta ke m+y+ní pemanutanieretsie wa+ríyarika pe’atamaix+ame kamatsinakiré.

Heiwamié y+k+ m+timayat+ka kena’in+ata, pex+kakahe’in+ata pem+karetimaní x+ka matsinakeni yat+katixa+. ¿Yuri pekare’in+atá?

MONSTRUO01.png

 ¿Perakumaikai kename meyum+iret+ y+k+ m+timayat+katsie hik+ mem+kaw+ “yuhamikuma wahámat+a” yam+ti’anene meteha’in+n+atat+ meteukatsut+ax+a xeik+a meteu’in+atakut+?  

NIXEWIT+ y+k+ m+timayat+ka matiyexat+at+ p+karahamikat+ni. Tsepá ‘aix+ peti’iyamate, tsitiyunanaiwie yat+ni wa’at+ ‘axa m+katiuka’iyarini hepa+ tiyuhek+á. Yuri pep+kati’eririeka… TIYUNANAIMAWAT+ ykaniy+aneni ‘ek+ 1,000,000 tipa+meme pekatiniukatsut+aweni ‘aix+ ranuy+t+kaime pem+’ananaimaka kaheuyewet+.

CONOCIMIENTO_TRSITE.jpg

Hek+á memuy+nát+we

“Pornografía” kanixatsiwani teuteri hek+á mem+yunát+we, ‘ameheuyumatet+ (heiwaka m+pa+ m+kati’ane) meheuxetat+ hípame wahámat+a meyunát+wet+ yat+ni yuk+mana, me’anayeneikat+ m+tixexeiyar+watsie, ‘+kiyatsie yat+ni internet-tsie. Yam+tiy+ane kakananuy+neni kename ‘ememeuy+mait+ka meyunait+mat+ yam+ti’anene mete’axeiyawawe yat+ni wanake. Ke hate ‘ik+ mem+tewewie yat+ni memenutuayá ‘aix+ pem+reu’eriekak+ mekakateniyurieka, ‘atuminik+ xeik+a mekateniyurieka.
Hípat+ t+rí 11 witari meheuyumait+kait+ yat+ni   tsimeheuyumait+kait+ hek+á mem+yunát+we internet-tsie mexexeiyat+ mekateniukatsutsut+wani. 93% ‘ukitsi tsiere 62% ‘ukari temariyari yat+ni ‘+imariyari hek+á mem+yunát+we mekaniutixexeiyani, ‘ik+ ts+ katinakuneikani m+k+tsie xeik+a mem+tehetimámatekek+ ke mem+’it+t+aka mem+wanake wahámat+a, “maiyá” mewaut+wet+ hek+á mem+yunát+we meteukaxexeiyat+, ‘imiérika tsiere ‘itárika tsikarayemiet+, hek+á meyuyuriekaku mana ta ‘ukari ‘ukitsi metewaraye’at+iriwat+  me’ahek+k+arekaku nanaimárika yeiyarieya kaniuyuweiyani ‘ukari m+pa+ ‘ayumiémek+ xeik+a ‘axa mekateniyeh+awarieka, ‘aix+ ‘anémek+ mekakanixeiyarieka, tsiere mekatenikwinit+arieka mem+kumay+iwatsie.   
Yémek+ tekamate’ah+awe kename hek+á mem+yunát+we pexexeiyat+ maiyá pe’anayehapanani. X+ka xewit+ matixeitsit+aka ‘+kiya yat+ni memanayeneika meheuxetat+ me’ayehut+ yapauka ‘apápama m+pa+ pem+tiwarah+aweni matixeitsit+a ta pem+háyewa, ‘ahetsie pem+tanuani. Kepai m+pa+ matsiyuriene matsinanaimam+t+ kaniy+aném+k+. Hamat+ana pemuyeikani kakaniy+weni, tsepá m+ti’amaré. Pep+kawanunuwani ke m+’ane ‘aix+ pem+ti’iyama parewiya pem+tawawirieni.

CONOCIMIENTO_TRSITE.jpg
FANTASMA02.png

X+ka xewit+ nemaré netsi’unanaimani nekarayuxaxatani, m+k+ maine kename netsiheuyeh+wá tsepá ta ‘aix+ nekareitimait+yeika m+kanetsiwayá. Wa’at+t+ p+kanetikwinit+a.

X+ka xewit+ ‘amaré yat+ni ke m+’ane pemeunaki’erie matsinanaimaka ‘axa kani’aneni. Pep+ka’a’eirieka parewiya keneukuwawá. Xewit+ yuri matseuyeh+at+ kamatsi’unanaimawe.  

Nep+nemate tsiere nep+ne’+wíya

Namiem+t+ wa+ríyarika m+yex+at+arieka tanait+ tekatenitexieka. Kaneumakam+k+ kepai tsepá ke meuyumaiká ‘axa kaniumayareni m+pa+ x+ka ranuyemieni. Tepeitimámatekeni ke tem+y+ní x+ka m+pa+ ti’anemetsie te’uyenex+ani, mets+ tsiheuyumait+ tem+wamate teuteri tem+wareunaki’erie mekatenayurieweni, ‘ayumieme kwínie m+tiyuta’+wíyani.

Ke hate mem+teyunánaimawa yéme hurawa memu’uwa mekatenayurieweni, teuteri ‘axa mete’aka’eriet+ xeik+a mekakateniyuyuruwani. Mekaneuxuaweni ‘emeheuyumait+kait+ taheimá me’uyehut+, heiwaka kename mewaikat+we mekanikuyuruwani mematsinanaimam+t+ mekaniy+aka. Ke pauka m+pa+ tem+teu’erieka kwí ke m+reuy+weni mutahiwa tsiere yapauka muyutaxata kepai ‘aix+ m+tatsimat+wa hets+a tem+te’amate m+tatsiuparewiwe. Ke hate yamem+te’u’iyari meheumamat+  mekatenatah+awikuni kename x+ka yate’utiyuani y+k+ metayurieni. Yuri tep+katewa’eririeka, taheimá tepeukanunuwani.     

FANTASMA01.png

¿Netinewieka x+ka xewit+ tewi netsi’ukananaimaka “’aix+ nem+tiuka’iyarik+”?

‘Ek+ pekaniy+weni xeime pem+raxaxat+wani kepa+ matixeiya tita m+kamatikunanake tsiere ‘aheimá nunuwame pekanexeiyani tita ‘aix+ matiku’erit+wa pem+tiwauneni tsiere tita ‘axa matiku’erit+wa yat+ni ‘axa matimat+wa pem+katinaki’erieka.

LUZ_CONOCIMIENTOFELIZ.jpg

Yukwaxuatsie ke m+tiukwine x+ka hek+á memuyunát+we tixexeiyani.

M+tiutinar+manitsie “dopamina” titéwakame ‘akwaxua ta+tá kaniyutatuayani, k+mana tsim+timayát+ka tem+teu’enie tsiere ke temeteu’erie. “Hek+á mem+yunát+we m+tixeiyanitsie, ‘ik+ “hormona” wa+ká kaniyutatuayani, kwaxua ke m+reukuwewiya y+k+ kaniy+m+k+ tsiere yuyuriepatsie, yumumetetsie, tatet+ata m+titaneikat+katsie yat+ni ‘iyaritsie m+rawiyat+katsie katiniukwínim+k+”.

Instituto Max Planck para el Desarrollo Humano Berlín mieme maiyá yeikiyari xeime memutawewi ‘ipa+ katiniuyun+ní: “’Axa ti’anet+ katiniuyukaxeiya hek+á memuyunát+we m+xeiyanitsie rakuneikat+. ’Ik+ “estudio” muwewiya yakanaineni kename hek+á mem+yunát+we x+ka tixexeiyani takwaxuatsie tekateniukwiniweni.  Katinanayeneni waniu x+ka wa+kawa hek+á mem+yunát+we tixexeiyani, takwaxua herie mieme m+rayukawiwiyat+katsie katiniyukwinit+akam+k+,   tsiere, ‘ax+kai reutamaiwet+ kanayeim+k+ reumiet+ ta ‘axa kaniy+m+k+.

Revista.jpg

X+ka ‘areuteterini hek+á mem+yunát+we tixeiyat+ yukwaxua herie yatitsuit+ tik+tsimaiyet+ m+kawere kaniyux+t+akam+k+, kwaxua yak+ ti’uximayat+ tsiere xeime mat+a mukahupunitsie yaxeik+á kareu’eniet+ kanayeim+k+.

CONOCIMIENTO_TRSITE.jpg


1.  Wa+kawa pekatiniuti‘iwauweni ‘ena peuhame.  

 MEUHANÍ MUTI’IWAUX+ANIK+:

Ke na’eriwat+ hek+á mem+yunát+we xéiyarikak+ ra’iyari ‘aix+ kakaniuy+m+k+.


Hek+á mem+yunátiwe xexeiyame (yémek+ m+k+ xeiyarikatsie kawiet+) memanayeneika 3.000 horas tsiere wa‘+kiya 100.000 pa+meme tixeiyame, tsiere 200 horas niukametsie wareuh+aweme kanitay+m+k+:  ¿Tawaarí katixuawe? ‘Ik+tsie kawiet+ yutukari kaniutax+t+am+k+. Hek+á mem+yunát+we xéiyarikak+ ‘ipa+ katiniuyukweriwayuriem+k+:

MONSTRUO_IGNORANCIA.jpg

Hek+á mem+yunátiwe ‘etsiwa t+t+ x+ka tiutixeiya yuxaitá yuh+awet+ hípame warukananaimat+ kanayeweweni.

Hek+á mem+yunát+we xéiyarikak+ m+tinanenitsie yaxeik+á m+kare’eriet+yeikani ri.

Hek+á mem+yunát+we xéiyarikak+ hípame ke m+tiwananaimani xeik+a katini’iyarimakam+k+.

Teuteri hek+á mem+yunát+we mem+texexeiyá mex+iwa ‘ik+tsie mekanikaw+riwaweni yam+ti’anene matsi kwínie meteuxeiyakut+ tsiere ke mem+teniere m+pa+ meteu’iyarit+ mekanayex+rieweni.

Kiekaritsie m+rayukwine hek+á mem+yunát+we xéiyarikatsie rayewíyat+ katiniy+aneni.

Hek+á mem+yunátiwe xéiyarika ke neupata ‘aix+ ‘anémek+ hípame pewaxeiyat+ tsiere mematsikanake wahámat+a ke pemutiy+neni ‘ak+mana ke neyemaiximeni.



 

¿MEM+TATSINAKE WAHÁMAT+A KE TEM+’IT+T+A TIMAIWE?
Hawaik+, ¡¡Kakanimaiweni!! ‘ik+tsie ke tem+’it+t+a tatukaritsie katinimiemet+ni, tsim+tatimat+wa mana tekateniukaxexeiyani ke tem+’anene t+riyari, temaik+yari yat+ni ‘+imariyari, tsiere ‘ateheuyumatet+ temak+katsie; tsim+tatimát+wa y+k+ ‘aneneme tekatenimait+weni tihéhekwame tem+teuyukaxexeiriwatsie.

Pekatinetimámatekem+k+ tita rayexeiyat+ m+rayaní ‘ik+ tsimatimát+watsie m+reutin+’+ ‘ik+ ta katinetimaim+k+ xeik+a ‘aix+ ‘anémek+  ti’+kit+ariet+.

¿WANIU TIYURI MEM+TATSINAKE WAHÁMAT+A KE TEM+’IT+T+A TIHETSIE MIEME X+KA TIYUKUXATANI HÍPAT+ TEUTERI ‘AXA RANUY+T+KAIME METETI’IYARIMAWA?

¡¡¡Hawaik+!!! Maiyá yeikiyaritsie katinihek+aka kename temari tsiere ‘+imarixi yuk+mana mem+tatsinake wahámat+a ke tem+’it+t+a hetsie timieme meteheumaiku. ‘AYUMIEME ‘ATSIKATIKU‘ERIWAT+ X+KA TIYUKUXATANI, yaxeik+á yuri niukik+, ‘aix+ matsi teteta’eniet+ tsiere te’atakumait+ ta’iwama waheimá teka’uyehut+ tekanayex+r+wem+k+.

¿PERAKUMAIKAI KENAME…?   Ts+karik+ maiyá m+’awietsiekatsie yat+ni tinákemek+ kakatikuxaxatsiwakaku tsiere ke ‘anémek+ m+tiyukuxata kamatsi+k+kaku ‘ana m+ h+awiya kananuyutah+t+wani ‘ipa+ ‘utiyuat+: “X+ari ts+ mem+tatsinake wahámat+a ke tem+’it+t+a hetsie timieme katinimaiweni, ‘ayumieme maiyá kani’awietsieka”.

¿KE TITA RANUY+NE ‘AK+MANA ‘AHETSIE MIEME PEMANIUKANI MEMATSINAKE WAHÁMAT+A KE PEMEUY+M+K+ HETSIE TIMIEME?

Kename ts+ mematsikane wahámat+a ke pemeuy+m+k+ ‘ahetsie mieme pemaniukani pey+we; x+ka ‘ak+mana maiyá pewaunet+ peheitimaix+ame pe’utay+ní kename ‘ahetsie rakait+ rayaní ke pemutiy+neni tsimatimat+wa pe’ayexeiyat+ tsiere ke matiuyuriwe x+ka ‘aix+ pekatiu’a’+wíya. ‘Ik+ niuki yamanuy+nek+ tsiere ‘+kit+arika ya’anémek+, ‘ak+mana pem+retimaní ke pauka tinaimetsie ‘aix+ pem+’aneni xeime mat+a pemukahupuni, pe’aku’+wíyat+ yapemayeikani… ‘Axa pem+katiti’erieni tsiere pem+ka’atitewiya, p+ta kename tatukari meuhane timieme ‘aix+ m+ti’anene tih+k+ pekatineitimaix+am+k+, tats+ peha’akumait+ pe’uy+ka.

¿TITATSIE Y+K+ REKUY+NE “PENA” “PUDOR” NIUKI MUTIYUANE?

“Pudor” ts+ yunárikatsie heuyutewíyat+ kananuy+neni… me x+ka xewit+ teuxetakame tatsiuxeiya.  “Pena” tsiere “vergüenza” m+kuxaxatsiwa heimana ke tem+teka’eriet+k+ka tihípamek+ katinimiemet+ni, yu’iyaritsie m+tiuka’eniwani mana muyenenitsie.  

LUZ_CONOCIMIENTOFELIZ.jpg

‘Aix+ pereitimaix+ame ke ney+aneni

Wa+kawame maiyá ‘aix+ ‘aneneme ‘ik+tsie timieme x+ka perakumaiká, pereutaxataweni tsiere ke pem+y+ní x+ka pey+weni… ke pauka xeime mat+a pemukahupuni pem+ti’erieni, pe’ayukumait+ pakaniy+aném+k+, tats+a ri yapera’eriwat+, ‘aix+ ‘anémek+ tsiere pe’a’+wíyat+.

X+ka ‘aix+ ‘anek+a pe’utinuiwa tsiere pe’utaweré, penaki’eriwat+ tsiere pe’anu’enieriwat+, x+ka m+pa+ pehaku’aneni pep+kareutaunieka, meyuwa+kawat+ temari yat+ni ‘+imarixi m+pa+ mekakateneukuteni. X+ari ts+ tita ‘aix+ matiku’erit+wa, ‘aix+ mematexeiya tsiere ‘atukari hetsie m+tinuá pekatini’iyamakani. M+ri ta nunutsiyaripai ‘aix+ m+reukuwimarieka yakakatiniuy+we. X+ka ‘ahepa+tsita m+pa+ ti’aneni, yapep+ramaiká ‘ek+ tsepá hakiewa pemeuyey+aneni ‘aix+ pem+’ayurieni pekaniy+weni, kepai ‘ak+mana ke pem+tay+ní pekaniy+weni, ke pem+tiuwerix+ ‘aix+ mats+ pem+reukukaník+. Katinanuyehait+aka ‘ek+ ‘uxa’a warié ke pem+reu’axeiyam+k+ni ‘aix+ pem+tikuyuruwani. 


Heiwat+ ‘ik+ página maiyá matsiyetuiriwani, ‘ah+awiyatsie matiuka’etsirieni x+ka ‘ahamíkuma meteuyukananaimawani matikupit+wani kepa+ pey+me pem+wahayewa. Tsiere tekanitawewieni tematsiparewikut+ ke tem+’it+t+a yaxeik+á ke temuy+t+ka ‘ik+ hékwametsie heuyehaniké perakumait+ ‘ak+mana ke pemutiy+neni yapemainenik+.

Pepa’eriwani x+ka matsi wa+ká maiyá pehakumaiká ‘aix+ matsi pekatinikamiékam+k+ yaxeik+á ‘atukari tinaimetsie ‘aix+ ‘aneme pemayexeiyani. Muwerenitsie heiwaka heuriet+ m+yuh+aweni m+karakumate ranutaxeiyake.  ‘Ahetsie ke neuwa+reni, x+ka pekarakumaiká xeime ‘ahamika yat+ni xewit+ matsiteita ke pem+yurieni, ke neu’axeiya ke pemureu’erie, ¿’aix+ pereu’erie? ¿pereuwa+re? Kam+ts+, keneyeyeikani, tsimeteu’iyarime meyuwa+kawat+ mekamaniparewiékuni tsepá hakiewa ‘atukaritsie pemeuyey+aneni ‘amaremé wahepa+. X+ka ‘amaremá mematsiparewieka, mematsi’enieka tsiere mematsiyehanani, pep+kawataunieka. Yunait+mat+ mep+kawarexeiya. X+ka xeime pe’uparewiweni yutukaritsie ‘aix+ matsi m+tikamiénik+, x+ari ts+ tsipekatinika’eriem+k+. Tixa+ p+katixuawe ‘aix+ ‘umayaret+ hípame m+waparewiekatsie.


M+ ri ta x+ka xewit+ matsiteitat+ ‘axa matsimat+aka, x+ka y+k+ m+timayat+ka ti’iyamakani yat+ni ye’eni, x+ka ‘aix+ ti’aneneme kamatikupit+wani, matsikweriwayurieka tsiere heu’eriet+ matikuxaxat+wani, ‘aix+ kakani’aneni hamat+ana pemuyeikani. Heiwaka teits+ya xeik+a mutanaki’erieni “memakumatiwak+” yat+ni tsimem+te’aka’eriek+, yat+ni wa+kawa tumini memuyemanak+. Ts+ katiniyurit+ni, x+ka ‘aix+ mematsimat+wat+ pemuwayeika pekawarukaxeiya wa+ríyarika kakatine’ane pem+wan+ká.

X+ka ‘aix+ pereu’eriet+ pemukaník+ pera’iwauweni y+k+ petiyurienet+ pekaniupariyar+weni. Xapate teyute+tame mekanih+k+t+ni, yat+ni wewiyari hepa+na waikari pemayaxeiyani pekaniy+weni. M+ranukuweiya katinixuaweni ‘at+r+kariya matiwawiriet+ mana m+ heiwaka teuteri wahámat+a m+tiuyuti’+kit+ani ‘aix+ reu’eriet+ kaniwarukaxeiyam+k+.

Teuteri MEM+TEYUNANAIMAWA  mematsikweriwayurie ke newaruhayewa. X+ka peha’akumaiká ‘axa petiuka’iyárini ‘aix+ ta petiuka’iyarit+ peheuyeim+k+ni, ke ne’atemawieka, yuk+mana mayukaxexeiyani ka neuyewekani yutukari hetsie munuakak+ tsiere ‘aix+ matsi m+reukukaník+. Parewiya pem+tatsitawawirieni kaniy+weni.

 

‘Ena ke tatina’ut+iri: contacto.consexual@gmail.com

Ta’iyarik+ temate’ah+awe ‘ik+ página kename matsiparewieni ‘ena yapemeuyey+anetsie tekatena’eriwani. X+ka matsi’unakiré, ‘amama, ‘apapa, ‘akurika, ‘amatsika tsiere ‘ahamíkuma ke newaretaxat+a. Heiwat+ x+ka wa+kawa ‘ukari tewaruparewieni ke mem+’anene mem+tehamaikak+, mem+yuh+kak+ tsiere kename mem+tatsinake wahámat+a ke tem+’it+t+a tatukaritsie timieme ti’ane mem+tetimámatekenik+ ‘ayumieme ta ‘ayukumait+, tinait+ retimaix+ame tsiere rakumait+ tixeiyat+re.

 


Pam+pariyutsi ‘ena petatsi’uta‘iwatax+k+

CONSEXUAL.MX